Скопје, 15 декември, 2023 година - Проекциите на населението 2022-2070 година што ги изработи Државен завод за статистика, со поддршка на УНФПА Северна Македонија, денеска беа објавени во Скопје, во присуство на претседателот на државата, претставници на Владата, пратеници, на меѓународната заедница, на академијата и медиумите.
Проекциите на населението до 2070 година се втори од осамостојувањето на државата и се прават после 25 години. Тие се патоказ при креирањето на политиките и стратегиите на државата со фокус на демографските случувања во минатото, сегашната состојба и можните сценарија за иднината.
„Во голем број земји, особено од Централна и Источна Европа, со децении е присутен трендот на намалување на населението, пред се, поради ниските стапки на фертилитет, високиот морталитет и високиот степен на иселување и тоа на младите луѓе на репродуктивна возраст”, изјави Афродита Шаља, шефица на УНФПА Северна Македонија, во воведното обраќање пред присутните.
Таа посочи дека овие состојби треба да не поттикнат да бараме креативни решенија за надминување на главните причинители на ваквите демографски промени и искористување на можностите што тие ги нудат.
