You are here
Нови изданија
Систем за управување со информации за родово базирано насилство
Предлог национален модел за развој на интегрирано прибирање податоци за родово базирано насилство во Северна Македонија.
Eтичко известување за родово-базираното насилство во Северна Македонија
Медиумите играат важна улога во формирањето на општествените ставови и вредности и нудат огромен потенцијал да бидат инструмент за општествени промени. Според истражувањето спроведено од Агенцијата за аудио и аудио-визуелни медиумски услуги, сè уште постои „широко присутно портретирање на жените во медиумите преку рамките на бракот и семејството“, со задржување на традиционалните улоги на жените и со нагласување на стереотипите.
Од друга страна, сеопфатната студија за благосостојбата на жените покажува дека во Северна Македонија 60 % од жените сметаат дека насилството врз нив е вообичаено, а речиси три од десет сметаат дека тоа е многу честа појава2 . Споредено со просекот во земјите на ЕУ, во Северна Македонија жените сметаат дека семејното насилство е приватна работа што треба да остане во семејството.
Ваквиот став, во комбинација со отсуството на знаење за постоечките специјализирани услуги за заштита на жртвите на семејното насилство4 , резултира со сериозни повреди на човековите права на жените.
„Состојбата на работната сила во акушерството во Источна Европа и Централна Азија“
Нарачан од Регионалната канцеларија на УНФПА за Источна Европа и Централна Азија, со поддршка од Регионалната канцеларија на Светската здравствена организација за Европа, Извештајот за состојбата на работната сила во акушерството во Источна Европа и Централна Азија содржи податоци за моменталната состојба на работната сила во акушерството во 17 држави и територии во Источна Европа и Централна Азија.
Извештајот го нагласува фактот дека соодветно обучените акушерки можат да помогнат да се задоволи околу 90 отсто од потребата за суштински интервенции за сексуално, репродуктивно, мајчино и новороденечко здравје, како и здравјето на адолесценти во текот на животот. Исто така, ги нагласува многуте социјални и економски придобивки од инвестирањето во акушерството: поздрави семејства, продуктивни заедници и здравствен систем што може да обезбеди сеопфатни услуги за сите. Имајќи ги предвид овие придобивки, креаторите на политиките можат да го користат извештајот како насоки за инвестирање во акушерки и со тоа да обезбедат подобри социо-економски резултати.
8 милијарди животи, бесконечни можности: случај на права и избори
Стравовите за населението се широко распространети и владите сè повеќе усвојуваат политики насочени кон зголемување, намалување или одржување на стапките на фертилитет. Но, напорите да се влијае на стапките на фертилитет се многу често неефикасни и може да ги поткопаат правата на жените, се наведува во Извештајот на УНФПА за состојбата на светското население, објавен на 19.април 2023 година.
Извештајот „8 милијарди животи, бесконечни можности: случај на права и избори" повикува на радикално преиспитување на тоа како се обликува бројот на населението, апелирајќи до лидерите да ги напуштат преобемните наративи за бумот и падот на бројот на населението. Наместо да прашуваат колку брзо луѓето се репродуцираат, лидерите треба да прашаат дали поединците, особено жените, имаат можност слободно да донесат свои репродуктивни одлуки – прашање чиј одговор, премногу често, е не.
Поимник на родово базираното насилство извршено со (зло)употреба на технологиjата
Родово базираното насилство изршено со (зло)употреба на технологијата (РБНИУТ, англ. Technology facilitated gender-based violence – TFGBV) е релативно нова појава, нешто што би било речиси незамисливо пред триесетина години. Со сѐ поголемата застапеност на информациските и комуникациските технологии во нашиот секојдневен живот, до степен до којшто сега е тешко да се замисли еден најобичен ден без интернет, лаптоп, паметен телефон или без социјалните мрежи, родовото насилство извршено во дигиталниот простор станува сѐ позачестено.
Извештај за состојбата на светското население 2021
Извештајот на Фондот за население на Обединетите нации - УНФПА за Состојбата на светското население за 2021 година, објавен денеска, наведува дека на речиси половина од жените во 57 држави во развој им се негира правото да одлучуваат дали да бараат здравствена заштита, дали да имаат сексуални односи со своите партнери или да користат контрацепција.
Прирачник за постапување на здравствените работници во случај на родово базирано насилство, вклучувајќи ги и лицата со попреченост
Овој Прирачник е наменет за здравствените работници со цел да им послужи како водич и да им ја олесни работата во секојдневната пракса и примената на протоколите за постапување во случај на родово базирано насилство (РБН), вклучувајќи ги и лицата со попреченост.
За таа цел, прирачникот обезбедува практични совети за евидентирање, документирање, пријавување и системско собирање на податоци и за следење на РБН и попреченоста, согласно Законот за евиденции во областа на здравството и препораките на Светската здравствена организација (СЗО), за зачувување на телесното и психичкото здравје на жртвата, како и за санација на настанатите повреди и психолошки трауми.
Прирачникот примарно е наменет за здравствените работници (лекари, медицински сестри и други здравствени работници) кои работат во првата линија на здравствена заштита во случај на РБН, но може да им користи и на други здравствени професионалци, истражувачи на РБН и раководители на здравствени установи. Со негово користење може да се придонесе во воспоставувањето на интегриран систем за следење и одговор на РБН на национално, регионално и локално ниво.
Прирачникот е достапен на македонски и албански јазик.
Состојба на светското население 2020
Секој ден стотици илјади девојки ширум светот се подложни на физички и психолошки или, пак, комбинирани штетни практики, со целосно знаење и согласност од страна на нивните семејства, пријатели и заедници. Ефектот од ваквите практики ги зголемува родовите стереотипи и нееднаквости и го бранува целото општество.
Опсегот на штетни практики е огромен, меѓутоа три од нив кои речиси на универзално ниво се осудуваат како кршење на човековите права, сепак, остануваат особено и широко распространети: осакатувањето женски гениталии, детските бракови и преферирањето син/машки пород.
Овие практики ги преминуваат границите и културите. Тие се разликуваат според спецификите на нивното извршување – гениталиите на девојчињата може да бидат осакатени во детството или, пак, во адолесцентниот период, тие може да бидат омажени за да се „заштитат“ од силување или, пак, во рамки на трговија, детето може да се „избрише“ уште пред раѓањето или, пак, да се занемарува. Меѓутоа, овие практики имаат слично потекло, тие се вкоренети во родовата нееднаквост и желбата да се контролира женската сексуалност и репродукција. Иако нанесените штети имаат уништувачки карактер врз поединечните жени и девојчиња, штетите што му се нанесуваат на целиот свет и на идните генерации, сепак, може да бидат од многу поголеми размери. Паралелно со нарушувањето на здравјето, образованието и човечкиот потенцијал на жените и девојчињата исто така влијае и врз човештвото во целина.
Сепак, ние ја имаме моќта да им пркосиме на силите што ги поттикнуваат ваквите штетни практики и да создадеме свет каде што секоја жена и девојка ќе може слободно да ја планира својата иднина.
Времени препораки за постапување со бремени пациентки за време на пандемијата со КОВИД-19
Овие времени препораки се базирани на досега достапните сознанија за состојбите поврзани со болеста КОВИД-19, предизвикана од вирусот SARS CoV 2 и се однесуваат на здравствените работници кои доаѓаат во контакт со оваа категорија на пациентки. Тоа се матичните гинеколози, гинеколозите кои се одговорни за грижата во родилиштата, педијатрите, акушерките и сестрите задолжени за антенаталниот и перипарталниот период, како и сиот останат здравствен персонал вклучен во следењето и лекувањето на бремените пациентки.
Овие препораки се развиени со цел да се обезбедат информации на здравствените работници, а дел од овие информации здравствените работници ќе ги споделат и со своите пациентки за да се обезбеди нивно правилно информирање и соодветно следење во текот на бременоста, како и во постпарталниот период. Тоа е делот од информации кои се однесуваат на општите препораки за превенција на ширењето на инфекцијата со коронавирусот, како и оптимизацијата на прегледите на бремените жени, со цел да не се изгубат придобивките од редовните антенатални контроли, а по потреба да се намали нивниот број и обезбеди превенција од заразување на пациентката со болеста КОВИД-19.
Во рамки на препораките се вклучени и неколку алгоритми за олеснета прегледност на постапките кои треба да се преземат кај пациентките суспектни или со потврдена инфекција со коронавирусот, и тоа во тек на антенаталните контроли, тријажа на пациентки со симптоми за КОВИД-19, хоспитализација на ризични пациентки, начин на завршување на породувањето и постпородилниот период.
Со оглед на релативно краткото постоење на КОВИД-19 и секојдневното објавување на медицински податоци и дополнувања за влијанието на вирусот SARS CoV 2 на здравствената состојба кај трудниците врз база на медицина базирана на докази, во најскоро време доколку се појават отстапки од сегашните предложени препораки, истите ќе бидат понатаму вклучени во овој текст.
Последиците на Ковид-19 врз постарите лица: Справување со пандемијата
Глобалната мрежа за стари лица на УНФПА подготви краток технички преглед со цел да го надополни краткиот преглед на Одделот за економски и социјални работи на Обединетите нации во однос на постарите лица и заразата од Ковид-19, со кој се потенцираше потребата од хуманитарна акција за решавање на потребите на постарите лица, спроведена во рамки на справувањето и одговорот на пандемијата на Ковид-19.
УНФПА се фокусира на човековите права, здравјето и заштитата на постарите лица од Ковид-19 и со овој документ се истакнуваат релевантните иницијативи што ги водат канцелариите на УНФПА ширум светот. Потребата да се одговори на правата и потребите на постарите лица целосно е во согласност со Глобалниот план за справување со Ковид-19 спроведен од страна на УНФПА, чија цел е никој да не биде изоставен.
Со овој документ се потенцира улогата на УНФПА во однос на поддршката за соодветно справување со Ковид-19 од страна на ООН на ниво на државите каде што е присутна пандемијата, под водство на Постојаниот координатор на Обединетите нации и Светската здравствена организација (СЗО). УНФПА, исто така, го поддржува граѓанското општество да се залага за учество на постарите лица на политичката сцена, со цел да се слушне нивниот глас при справувањето со кризата од која всушност тие се најмногу погодени.
Pages
- 1
- 2
- 3
- 4
- next ›
- последно »