Маврово, 26 јули – Денеска во Маврово започна тридневна работилница за градење капацитети со членови на локалните младински совети и службеници за млади од четири општини – Гостивар, Охрид, Битола и Велес.

Целта на работилницата е да ги зајакне членовите на локалните младински совети и службениците за млади со знаења и вештини за активно вклучување во различни аспекти на управувањето и креирањето политики, истовремено поттикнувајќи го разбирањето на важната улога на членовите на младинските совети како застапници на своите врсници.

На настанот учествуваше разновидна група млади, а послужи како платформа за споделување искуства и знаења.

На работилницата беше опфатен широк дијапазон теми, какви што се значењето на гласот на младите во осмислувањето на политиките, стратегиите за ефективно застапување и улогата на младите како активисти во засилувањето на иницијативите водени од младите. Во текот на работилницата, учесниците имаа можност заеднички да планираат различни активности поврзани со одбележувањето на Меѓународниот ден на младите на локално ниво. Во наредниот период, УНФПА ќе ги поддржи локалните младински совети преку обезбедување приспособена обука со која ќе се одговори на специфичните потреби на советите.

Овој настан се одржа во рамките на проектот „Млади за инклузија, еднаквост и доверба“, финансиран од Фондот на Обединетите нации за градење мир.